شعب التفاهة والتطاول على مؤسسات السيد

هلأ صار دوري إحكي عن مطعم الساحة و المنقوشة :

هيدا المطعم تصنيفه خمس نجوم وفي لائحة أسعار إلزامية بتفرضها وزارة السياحة على كل مؤسسة سياحية تبعاً لتصنيفها ، ورغم هيك مطعم الساحة بسعّر كأنه مصنف أربع نجوم .

مطعم الساحة بطعمي 350 عائلة وكل ارباحه تخصص للأيتام : تعليمهم وكساؤهم ومنح اجتماعية للعجزة والفقراء المسجلين بمكتب الخدمات الاجتماعية التابع لمكتب السيد فضل الله رحمة الله عليه .

مطعم الساحة مستوى النظافة فيه 9/10 ولحومه طازجة وحلال مش لحم برازيلي متلج ، و مستوفي لكافة الشروط الصحية وفقاً لكشوفات وزارة الصحة .

بالمناسبة في ناس بيتدينوا ليتزينوا و يروحوا يتعشوا بالزيتونة بيه ويدفعوا راتبهم الشهري ثمن لعشاء و على قلبهم متل العسل ، وهلأ عالسوشيل ميديا عم يحكوا عن منقوشة أرخص من فنجان قهوة بالمطار .

وكل المطاعم خارج بيروت أسعارها أضعاف أسعار الساحة بس الكنيسة القريبة ما بتشفي .

القصة مش مطعم الساحة ، القصة في جماعة حاقدين عالسيد فضل الله الرحمة لروحه ، و همهم توهين وتدمير وافلاس مؤسساته و إزالة فكره ونهجه لأنه نور في ظلمة وظلام جاهليتهم وحقدهم ، وللأسف كتار من السفهاء هم أداة لمشاريعهم عن حسن أو سوء نية .

ملاحظة : الزبالة طاميتكن والزعيم داعسكن ، وبلا كهرباء وبلا مي وبلا طبابة وبلا ضمان ومياه ملوثة بحراً ونهراً والكن عين تعملوا ثورة …. كرمال منقوشة .

#شعب_التفاهة

—

كتبها المحامي الأستاذ حسن عادل بزي