الباقة الإعلامية بنت جبيل عروس الجليل موقع بنت جبيلي أصيل همه البلدة وشؤون أبنائها
كشف الكاتب والمحلل السياسي الدكتور حبيب فياض، سبب مغادرته الحوار مع الإعلامية “ديما صادق” ضمن برنامج “نهاركم سعيد” على شاشة الـ”LBCI” منذ حوالي اسبوع، متمنياً على الإعلاميين ممارسة دورهم الإعلامي الصحيح، والعودة الى الأخلاق، مشيراً في حديث خاص ضمن برنامج “حرتقجي” الذي يقدمّه الإعلامي هشام حداد، الى سعيه عدم الردّ أو التعليق على الحادثة ضمن وسائل التواصل الإجتماعي حتى لا يسمح لأي جدل او نقاش اعلامي غير أخلاقي، وقال: تبيّن لي فيما بعد أنّ ردّة الفعل الناس والسيدة “ديما” التي تفرغّت على مدى 3 أيام للرد على كلّ “like” أو “share” في حين اني على صفحتي الخاصة يوجد مئات التعليقات المؤيدة لي وانا لا أعلّق على الموضوع..
ويضيف فياض: اشخاص كثر مدحوني بـ 3 اسطر على الطريقة اللبنانية المعهودة، ولم اردّ على أحد حتى لا اسيء الى السيدة “ديما”، فلم اضع ولا أيّ “like” حتى لا أميّز بين الناس.. ولكن فيما بعد تبيّن لي فيما بعد، أن ضغط الرأي العام صحيح، وبالتالي عليّ توضيح ما حصل، خاصة انو في قاعدة تحكم الرأي العام بلبنان، ومتل ما بقول الإمام علي، “عندما يسكت أهل الحق عن الباطل، يتصوّر اهل الباطل انهم على حق..
أما بخصوص ليه ضهرت، بصراحة في سببين:
الأول: أنا كنت قدام حالة لا مهنية بالكامل، يعني فضيحة الفضايح.. كأن اقول الك يا “هشام” إنو الفنجان يللي قدامك لونو اسود، بتقلي لاق يا “حبيب” لونو mauve، فبقلك ايه لونو اسود، فتضطر لتقل لي، لونو مش أسود! واصرّ بعناد على القول بأن لون الفنجان اسود لعدة مرات..
شو بقول “google” عن ديما؟
يتابع الدكتور فياض حديثه: هذا الإصرار المقصود لخمس او ست مرات معي على الهواء مباشرة، وانا أشير اليها بأنّ محرّك “google” ليس من شأنه تأكيد الأخبار إن كانت صحيحة أم لا؟ لأنه لنفترض أردت انا اليوم البحث من خلال المحرّك “غوغل” عن أي إنسان، لنفترض عمن يدير الحوار، يمكن إكتشاف الكثير من الأكاذيب والإفتراءات التي تطال أي شخص ومن بينها “ديما صادق”.. والسؤال يبقى هل نقبل بتحويلها الى وثائق وثوابت لنبني عليها بالتحليل.. وعَ سبيل المثال في روابط معينة بـ”غوغل” عامليني ايراني ومجنس بطريقة غير شرعية، فهل يمكن محاكمتي على هذه الحقائق الخاطئة، وتحاكمني على انّ جدي في ايران وتسألني عما كان شغلو!! وتصرّ ع قولك بانو عَ غوغل، هناك هذا الكلام…
يعقّب فياض أنّ الفيلم الممنتج الذي عرضته قناة الـ”LBCI” بخصوص مقابلته، بالإشارة الى انّه تمّ تقطيع المشاهد بطريقة مجتزأة، لأني أنا كنت أتحدث عن الصورة، فقلت لها بأن الشرطة الإيرانية ليسوا مضطرين للباس أقنعة، والقناع التي تعرضينه هو عَ غرار الأقنعة الموجودة عند “داعش”…حتى إذا بدّك هيدا الميدان وهيدي الطريقة بالشغل مش طريقة المعتمدة لدى الإيرانيين..
أما السبب التاني الذي جعل الدكتور حبيب فياض إنو يضهر، هو وجود قاعدة بعلم الأخلاق.. يعني بدي قولا، وما قصدي سيء لحدا، عم احكي بشكل عام.
وقت العاقل يناقش الأحمق، مش الأحمق ببيّن عاقل، العاقل ببيّن عليه إنو صار احمق..
انا وصلت لمرحلة يا استاذ هشام، انو هيّي عم تقلي شو عم تعمل هون.. وكأنو إنو نحنا قاتلين حالنا.. وأنا ما عم بالغ، نحنا كتير منتعرض لانتقادات وقت يللي منطلع مع وسائل إعلام من الطرف الآخر.. وشخصياً ليس لديّ مشكلة مع “LBCI”، ولكن بقدر قولو اليوم إنو بعد يللي صار ليس الهدف منه الإساءة الى ايران، الهدف منه تبرير ممارسات “داعش” ضمن مشروع سياسي..
ويفسّر فياض فكرته: يمكن هييّ مش كشخص مش عم تبرر ممارسات داعش، يمكن هييّ مش عرفانة شو عم تعمل؟ يمكن هييّ مش هدفا هيك بس ينتج عنها ما اقول، لانو عندما اقول أنه بايران عم يعملو متل داعش، هيدا بيعني يا داعش فيكون إنتو تكملو بالطريقة يللي عم تشتغلو فيا، لأنو في ناس غيركن دول وبتعتبر حالا محترمة بتعمل متلكن، بالوقت إنو ايران كدولة تفكّر بالقريب العاجل لتصعد عَ سطح القمر… في ايران 30% من الإنتاج الوطني بروح للأبحاث العلمية، وهي من الدول القليلة في الشرق الأوسط يللي فيها تداول للسلطة..
وعن المقارنة بين السعودية وايران، يقول الد. حبيب فياض: هشام لابس جاكيت سودا، والغراب لونو اسود، بقول أنا عفواً هشام متل الغراب لأنو تنيناتون يشتركان بالسواد، يا اخي ايران دولة اسلامية، وداعش إسلامية، بس اسلام ايران بيفرق عن اسلام “داعش” قد ما في فرق بين السما والأرض، بس قِلا بِلا ضمن مخطط معين، وضمن مشروع معيّن، بدنا نشوه صورة ايران حتى نبرّر ممارسات داعش.
قبل بنهار شو قالت ست ديما؟
إنو انا بتحكي معي ديما، التنين باللليل، بتقلي بتقدر تكون معي التلاتا، بقلا: ايه.. فبتقلي بدنا نحكي عن الحوار بين حزب الله وتيار المستقبل، بدنا نرجع شوي لخطاب أمين عام حزب الله وبدنا نحكي عن اليمن. وأنا ما سمعت منيح آخر كلمة، فقلتلا عن شو؟ قالتلي عن اليمن، بدك انو ما نحكي عن اليمن! قلتلا لق ما عندي مشكلة..
أنا عم بينلّك إنو الأزمة مش سياسية، الأزمة إذا بدّك بجانب مهني، أخلاقي، لأنو أسوأ شي بالحياة، إنو إنتا تكون عم تمارس مهني وما تحقق مكاسب من خلال المهنة كمهنة بس تحققّ مكاسب من خلال الحواشي تبع المهنة، او من خلال اساليب أخرى مرتبطة بالمهنة، بس عَ الشاشة قد تبدو إنو المسألة مهنية.
ويقول فياض: بأول فاصل، أوحت للمشاهدين انو تابعينا أكيد بعد الفاصل، لحتى نحكي عن التناقض بين “داعش” و”ايران”. طيّب أنا تحت الهوا، قلتلا شو بدك تحكي عن ايران وداعش، قالتلي، لا لا مافي شي مهم.
القصة مش فخ، لأنو مش شطارة تخبي عني شي؟ هيدا ما قلو علاقة بالفخ، هيدا قلو علاقة بالمصداقية المهنية، والبعض اعتبر بالفريق الآخر إنو أنا هربت وما عندي جواب، انا ولا مرة محشور بسؤال عَ الهوا. ولا مرّة ما عندي قدرة عَ تقديم إجابة معينة على اي سؤال. حتى إذا بدي انحرج وهيدا السؤال يدين جماعتنا، بعترف فيه. فأنا مش عَ طول الخط، 100% بقعد بمارس عملية دفاعية تجاه الخط السياسي الذي أنا انتمي لإلو.
ورداً على سؤال وجهه الإعلامي احمد محسن في جريدة “الأخبار”، بقوله انّ هذا المحور الكريه لا يقبل النقاش.. يردّ الد. حبيب فياض: لم اذهب لأسباب سياسية، فيما لو كانت بالفاصل قايلتلي انو بدا تعرض صور عن ايران، ما كنت رح اعترض.. المشكلة ابعد من الجانب المهني. انو بالحدّ الأدنى في اصول للياقة بالتعامل مع الضيف، إنو أنا كاعلامي من حقي إحشر الضيف، بس ما لازم كون هدفي، إنو جيب الضيف لحتى بيّن هيدا الضيف ما عندو اجابة عَ اشكالية معينة، بالوقت يللي انا ما مستعد اسمع الضيف شو عم يحكي.. وبنفس الوقت عم ركّب مجموعة من المغالطات.
أين مربّع الشاشة يا LBCI؟
بالعادة محطة الـ”LBCI” بس عم يحكي رئيس الجمهورية متلاً. بيعملو مربّع داخل الشاشة، بشكل إنو بضلّ عندك مربّع تاني للإستيديو، هنّي خفوني نهائياً، وصارت المسألة إنو واحد بايران كان مش صايم بشهر رمضان وعم يحرقولو شفافو. طبعاً هيدا الحكي اتفه من يُردّ عليه.
فهني لعبو لعبة الصوت. وصرنا انا وديما عن نشتغل عَ الصوت، بوقت يللي كل الرأي العام صار عم يركّز على الصورة. ووقت يكون عندك صورة ما كتير بتركز على الصوت.
ليك نحنا اهل الحوار. ونحنا أهل الإنفتاح. نحنا اهل المحبة. نحنا اهل الجدل. نحنا اهل الخطاب بالتي احسن. بس انا ما قبلت على قاعدة انو نزل بي الدهر، حتى قيل علي ومعاوية.. انا لقيت حالي بلحظة ما انو استدرجت الى مكان خطأ، لمسألة قلها علاقة بالإعتبارات المعنوية، فأنا حتى احترم حالي، خرجت مش لإنو ما عندي أجابة..
ورداً على موقع جنوبية الذي أشار الى أن السيدة “ديما” طردت الد. فياض، سأل فياض الحاضرين في الإستيديو عمّا إذا كانوا شاهدو طرده…
ويقول فياض: محطة الـ”LBCI” مهنياً محترمة، بس كمحطة بالسياسة هي جزء من مجموعة كبيرة من وسائل الإعلام التي بالسياسة عَ خلاف معنا، وقصدي إنو محطة “LBCI” مش بريئة بالترويج للأخبار المسيئة التي تمسّ وتنال محور المقاومة والممانعة.
وبخصوص ليش بروح ع الـ”LBCI”، نحنا ناس اصحاب رسالة، انا شخصياً استاذ بالجامعة، وشغلتي بالأساس مش سياسة، ولكن بس ابعد 20 سنة عن ضيعتي نتيجة الإحتلال الإسرائيلي، ولاقي بآخر النهار انو خيار المقاومة هوي رجعني عَ ضيعتي، انو الخيارات الأخرى الدبلوماسية ما قدمّت ولا أخرّت ولا مرة وحدي ع مستوى الصراع مع اسرائيل. من حقي كون ساعتا وفي لخيار المقاومة، وكون جزء من البيئة الحاضنة للمقاومة.
أنا إنسان هلق معرّض بايّ لحظة إنو نكون اسرى معرضين للذبح، ونسواننا سبايا، ومقدساتنا عرضة للتدمير، نتيجة هيدا الخطر الداعشي، والخطر التكفيري يللي عم يحدّق أصحاب رسالة، وأي منبر نستطيع من خلالو اطلاق كلمة، أو موقف علّ وعسى ان تؤثر بالرأي العام وأن تؤدي الى إظهار الحقيقة لن اترددّ..
نقد لحزب الله وآخر لإيران
ورداً على سؤال، طالب حبيب فياض حزب الله أن يهتم بشؤون الناس، والنظر الى البيئة الحاضنة التي تعيش حوله، لأنّ الأولوية له هو موضوع المقاومة، وهذا الأمر جيد، ولكن اداء حزب الله مع الناس لناحية المطالب الإجتماعية مش بالمستوى المطلوب..
وعن توجيه نقد للنظام الإيراني، قال: بالنسبة للنظام الإيراني، اطالب السلطة التوقف عن الإقامة الجبرية لشخصيتين ايرانيتين، هما المير حسين الموسوي، ومهدي كروبي. اطالب النظام الإيراني بفتح حوار معون، وفك الإقامة الجبرية، واعتبارن جزء من الثورة، ويوم من الإيام كانو مقربين من الإمام الخميني، وإذا بفترة من الفترات غلطو او ما غلطو، لأنو آن الأوان لأن يلتئم شمل الإيرانيين تحت لواء الوطن، ويللي كلّ الإيرانية بحبو، بعيداً عن سياسة الإقصاء التي مارسها احمد نجاد.. بمعنى آخر اطالب الرئيس روحاني الذي أعرفه شخصياً بالانفتاح على هيدا التيار بخلاف وضع احمد نجاد.
امتيازات المسيحية كبيرة بايران
عن وضع الأقليات في ايران، يقول الد. حبيب فياض: في ايران 95 % من الشعب الإيراني شيعة، الشيعة بقولوها عَ سبيل النكتة، انو يا ريت منقدر نغيّر مذهبنا لحتى نعمل أرمن، او لحتى نعمل تركمان، لأنو الإمتيازات المعطاة لغير الشيعة اكتر من الإمتيازات المعطاة للشيعة.
ARARAT
وقلت لديما انو في طهران في نادي كتير كبير، يمكن يطلع قد بيروت، فطهران قد لبنان عَ كذا مرّة، اسمو نادي “ارارات” ، وبشارع “ارارات”، في نادي خاص للأرمن، يدخلون اليه، ويمارسون كل طقوسهم وعاداتهم، وما يرغبون به بعيداً عن أي التزام موجود لدى المسلمين. اللهم إذا كان فيشي إسمو اخلال بالآداب العامة.
يسأل حبيب فياض عن تقديم نصيحة للسيدة ديما صادق، يردّ: لا انصحها..
يُسأل، ما بقا تطلع معا، يقول: هييّ تحديداً لق.
يسأل: “lbc؟ يجيب: المسألة مرتبطة بجو عام، وبالجهة التي انتمي اليها…
وعن حوار تيار المستقبل وحزب الله، يقول فياض: كلبنانيين لمواجهة داعش والتكفيريين، يفترض التفاهم بين اللبنانيين. الجيش اللبناني لوحده لا يستطيع مواجهة خطر الإرهاب، وحزب الله لحالو ما بيقدر يحمي كلّ لبنان.. فتعو نعمل استراتجية موحدة لمواجهة هيدا الخطر… وبرأيي هناك امكانية للتفاهم على المدى المتوسط وليس عَ المدى القريب، لأنو يللي عم يصير بالعراق عَ مستوى “تكريت”، ويللي عم يصير بسورية على مستوى الجبهة الجنوبية، مش فلتة شوط، هيدي نتيجة اصرار وتصميم وارادة واثبات… لكل الذين هللوا وطبلو وتصوروا بانوا داعش قدر لا يُهزم، بتضافر الجهود بين ابناء البلد الواحد منهزم “داعش”…
4 رسائل اميركية للخميني
ورداً عن تهليل الفريق المؤيد لإيران، لعقد اتفاق بينها وبين أميركا، قال فياض: هناك ثوابت لإيران، هل تراجعت عن ايّ منها… والدليل على مجيء اميركا لإيران، ارسال اوباما 4 رسائل لقائد الثورة بايران، وهيي اكبر دولة بالعالم، وولا مرة ردّ عليه.
وسأل فياض، ماذا يمكن ان تفعل اميركا في اليمن عَ سبيل المثال، المشروع الإيراني الى تقدّم والمشروع الأميركي الى تراجع…
وأكدّ فياض انّ ايران خارج اطار قتاله لإسرائيل والإرهابيين، ايران لا علاقة بحزب الله بشيء.
ورداً على سؤال المواد الذي يعطيها للطلاب في الجامعات، قال: أنا استاذ فلسفة، بالضبط فلسفة لغة وتأويل، وفسلفة دين. وان كنت اعطي محاضرات لطلاب العلوم السياسية.
يُسأل الد. حبيب فياض عن السيدة ديما صادق، كظاهرة اعلامية من السيدات الجميلات، يقول: يوجد مطربات في البلد يغنوا، ولا صوت ولا آداء، ولا لحن وهشتك بشتك.. اذا الفنان بدو يعمل حفلة، ما بتلاقو مطرح. مش لأنو صوتو حلو. بالعام ومن دون تفاصيل.. التحدي الأبرز لأيّ انسان يمارس المهنة ان يحقق نجاحه من خلال المهنة وليس من خلال هوامش اخرى يريد ان يوظفها ع مستوى المهنة.. والجمال مش غلط، بس الغلط اعتبر حالي اني استاذ ناجح بالجامعة لأني جميل او طويل. أنا إذا بدي كون استاذ ناجح، بدي فرجي الطلاب انو قادر اعطي المادة.
عم يخدمونا
يُسأل: البعض يتهمكم أنكم ضدّ ديما، لأنها شيعية ولا تؤيد المقاومة، يردّ: بدك الصراحة، يللي هنّي شيعة من اللون الآخر، عم يخدمونا، لأننا متهمون باننا حالة شمولية ولا نحتمل الرأي الآخر، بينما هني عايشين بيناتنا. وواحد متل علي الأمين بيتو بالجنوب، وكل يوم بيطلع على الضيعة، وحكيو يللي بيحكي ما بينحمل، وما بينوصف، وحزب الله حريص ع حمايتو خوفاً من شي احمق يجي يتعدى عليه، ويصيرو يتهمو..
وينهي فياض كلامه، صدرنا رحب متل الإمام علي، نحنا منقول الناس أحد اثنين، إمّا أخٌ لك في الدين، او نظير لك في الخلق. المعيار يللي بقربنا او ببيعدنا عن الآخرين، هوي المعيار الأخلاقي، والأخلاقي بالدرجة الأولى.
شاهد الفيديو
